Нацыянальны акадэмічны тэатр імя Янкі Купалы і беларускі брэнд скураных аксесуараў Mattioli абвясцілі пра запуск сумеснага праекта. Да 106-годдзя Купалаўскага тэатра партнёры прадставілі лімітаваную капсульную калекцыю жаночых сумак і аксесуараў пад назвай «Ваш лепшы выхад».
Галоўная мэта сумеснага праекта — адрадзіць класічную культуру тэатральнага дрэс-кода і стварыць калекцыю на стыку нацыянальнай культуры і моды.
Візуальную аснову капсулы склалі вытанчаная класіка і глыбокі бардовы колер, які дакладна паўтарае адценне знакамітай аксамітнай заслоны Купалаўскага тэатра. Другі базавы колер калекцыі — элегантны чорны.
Склад лімітаванай калекцыі «Ваш лепшы выхад»:
- Дзве эксклюзіўныя мадэлі сумак з натуральнай скуры прэміяльнай якасці, распрацаваныя дызайнерамі Mattioli адмыслова для вячэрніх выхадаў і ўрачыстых падзей.
- Дзве мадэлі дызайнерскіх брэлокаў-абвесаў, якія дазваляюць персаналізаваць аксесуар і надаюць вобразу дынамічнасці.
Праект мае калекцыйны характар: калекцыя выпушчана абмежаваным тыражом, паўторная вытворчасць не плануецца.
Генеральны дырэктар тэатра Аляксандр Шастакоў адзначыў:
«Тэатр — гэта не проста прастора, дзе ажывае драматургія. Гэта асаблівы рытуал, які пачынаецца задоўга да трэцяга званка. Разам з Mattioli мы хочам нагадаць нашым гледачам пра магію падрыхтоўкі да спектакля: выбар лепшага ўбору і аксесуараў, стварэнне той асаблівай святочнай атмасферы, якая робіць вечар у Купалаўскім тэатры незабыўным».
Дырэктар брэнда Mattioli Наталля Тапальчан падкрэсліла:
«Для нас вялікі гонар дакрануцца да гісторыі галоўнай сцэны краіны ў год 106-годдзя Купалаўскага тэатра. У калекцыі «Ваш лепшы выхад» мы аб'ядналі наш шматгадовы вопыт працы з натуральнай скурай прэміяльнай якасці і непаўторны дух Купалаўскага тэатра. Бардовы колер заслоны, высакародныя фактуры і абмежаваны тыраж падкрэсліваюць калекцыйны характар кожнага прадмета».
Калекцыя ўжо паступіла ў продаж. Набыць вырабы з лімітаванай серыі можна ў ключавых фірмовых крамах Mattioli ў Мінску, а таксама ў сувенірнай краме Купалаўскага тэатра.
18 верасня гістарычнае фае тэатра сабрала вядомых беларускіх блогераў, журналістаў і прадстаўнікоў моднай індустрыі. Госці вечара ў элегантных вячэрніх уборах змаглі першымі ўбачыць і ацаніць лімітаваную серыю скураных сумак і аксесуараў, створаную да 106-годдзя Купалаўскага тэатра.
Прэзентацыя была пабудавана вакол традыцыі «выхаду ў свет» і тэатральнай культуры. Кадры з імпрэзы і знаёмства гасцей з калекцыяй з'явіліся ў сацыяльных сетках удзельнікаў і партнёраў праекта.
Яшчэ адной яркай часткай мерапрыемства стала адукацыйная лекцыя. Стыліст і заснавальніца Brands Fashion Show Ірына Нікалаева распавяла гасцям пра сучасную культуру наведвання тэатра і пра тое, як спалучаць элегантны дрэс-код з тэатральным этыкетам.