Час гаварыць па-беларуску: «Луч» паказаў новую калекцыю «Мова»

20 лютага 2026 года ў Літаратурным музеі Максіма Багдановіча прайшла закрытая прэзентацыя новай лімітаванай калекцыі гадзіннікаў «Мова» ад брэнда «Луч». Прысутныя прадстаўнікі культуры, медыя і сябры брэнда першымі ўбачылі калекцыю, прысвечаную класікам беларускай літаратуры. Асаблівым момантам стаў сімвалічны жэст — перадача аднаго з гадзіннікаў у дар музею.

Гасцей чакала насычаная праграма: паказ дызайнера, натхнёнага беларускімі матывамі, лялечнае прадстаўленне тэатра батлейкі, чытанне вершаў Цёткі, экскурсія і інтэрактыўны квіз.

Калекцыя «Мова» створана да Дня роднай мовы і прымеркавана да 135-годдзя Максіма Багдановіча і 150-годдзя Алаізы Пашкевіч (Цёткі). Гэта працяг ініцыятыў «Луча» па пераасэнсаванні нацыянальнай культуры праз дызайн і мастацтва.

Праект падкрэслівае важнасць мовы і культурнай ідэнтычнасці, аб’ядноўваючы мінулае і сучаснасць. У аснове калекцыі – вобразы двух творцаў, якія ўплывалі на дух і слова нацыі:

• Максім Багдановіч – сімвал гармоніі і паэтычнай глыбіні;
• Алаіза Пашкевіч (Цётка) – голас свабоды і грамадзянскай мужнасці.

Дзве мадэлі — мужчынская і жаночая — адлюстроўваюць два тэмбры, але адну ідэю: мова як аснова культуры і сілы народа. Калекцыя створана пры ўдзеле музея Багдановіча, што падкрэслівае яе аўтэнтычнасць і павагу да літаратурнай спадчыны.

Асаблівасці калекцыі:

• дзве мадэлі з уласнымі сімваламі;
• індывідуальны нумар кожнага асобніка;
• дзве папружкі — светлая з вышыўкай і цёмная з цісненнем;
• механізм «Луч» 1801.1, корпус з нержавеючай сталі, сапфіравае шкло;
• абмежаваны выпуск — 400 штук.

Калекцыя «Мова» — для тых, хто хоча адчуць сувязь з беларускай культурай і выбірае рэчы з сэнсам. Гэта прыклад таго, як сучасны дызайн можа падтрымліваць і захоўваць нацыянальную спадчыну, злучаючы гісторыю, літаратуру і моду ў адзіную ідэю духоўнай пераемнасці.